عمرو موسى ولا البرادعى ولا جمال
الاسم مش قضية حتى لو يكون بلال


نتمنى دورة ثالثة للسيد الرئيس
وهنقول نعم من غير جدال


ولو قال كفاية هنقول له شكرا
كنت رمز للحكمة والمرونة والاعتدال


ونختار رئيس له خطط واضحة
مدروسة واقعية مش خيال


فيها تطوير لكل العلوم
تحقق لمصر التقدم فى كل مجال


عاوزين خطة لزراعة الصحارى
كفاية أكل قمح كله سوس


عاوزين خطة لتطوير التعليم
ياما على التعليم ضاعت فلوس


عاوزين تطوير السكة الحديد
عيب القطار يخرج وعالناس يدوس


عاوزين خطة تتحدى البطالة
الشباب من الفراغ بيعاكس ويبوس


عاوزين ربط الوحدة الوطنية فيه
ناس هدفها التفرقة وشحن النفوس


عاوزين سور أمنى يمنع المخدرات
الشباب ثروة للبلد حرام تضيع


عاوزين خطة لاحتواء أطفال الشوارع
تجار المخدرات بيستخدموهم زى القطيع


الطفل محتاج أكل وشرب ونوم
وللتاجر هيكون عبدمطيع


عاوزين خطة لتطوير الثقافة
الثقافة مش كليبات والدنيا ربيع


عاوزين تثقيف الإمام والقسيس
يعلموا الناس الحب ورفض الفكر الذريع


عاوزين نكون ضد الحزن
عاوزين أمل ونجاح وطموح


مصر باركها المسيح فيها المحبة
وبالمحبة تلتئم الجروح


مصر لكل المصريين أصيلة
وفى الشدة بأسرارها تبوح


تقول يا اولادى قبل الطوفان
اتعلموا من فكر نوح


واختاروا ريس يمسك الدفة

يكون حكيم يرسم الطريق بوضوح



++++ بقلم
أحمد خليل السوهاجى
عامل بجامعة سوهاج

===================
نقلا عن جريدة المصرى اليوم
٢٤/ ٧/ ٢٠١٠
http://www.almasry-alyoum.com/article2.aspx?ArticleID=263609